Ўзбекистонлик боксчи Хуршид Тожибоев Рио-2016 олимпиадасидаги ўзининг иккинчи жангини ўтказди.

Буюк британиялик Жозеф Кординага қарши нимчорак финал баҳси қийин эмас, қандайдир хавотирли бўлди. Рақиб боксчиси ҳимоявий тактика танлаб, асосан ринг бўйлаб қочиб юрди ҳамда узун қўллари эвазига кутилмаган зарбалар беришга ҳаракат қилди. Биринчи раундда ҳакамларнинг иккиси Тожибоевга, бир нафари Кординага устунликни берди.

Иккинчи раундда устунлик тўлалигача ҳамюртимиз томонида бўлди. Фақат жанг давомида Хуршид икки марта рақибнинг белидан пастига зарба бериб юборди. Натижада рефери ундан бир баллни олиб ташлади. Шу боис, ҳакамлар 10:9, 10:9, 10:9 кўринишида балл берганига қарамай, амалда бу раундда дуранг билан якунланди — 9:9, 9:9, 9:9.

Учинчи раунд бошланиши олдида ҳали ҳеч нарса аниқ эмасди. Тожибоев натижага қаратилган аниқ хатти-ҳаракатларни амалга оширди ҳамда ҳакамларнинг барчаси сўнгги бўлимда устунликни ватандошимизга беришди. Якуний натижа — 2:0 (28:28, 29:27, 29:27).

Чорак финалда Хуршид Тожибоевга бразилиялик Робсон Консейсао рақиблик қилади.