Англия премьер-лигасининг 1-туридан ўрин олган «Арсенал» - «Ливерпуль» ўйини жуда қизиқарли ва голларга бой тарзда ўтди. Ўйинда ливерпулликлар кичик ҳисобда ғалаба қозонишди.
Биринчи бўлимда мезбонлар бироз ташаббусга эга бўлишди. 28-дақиқада Алберто Морено жарима майдончаси ичида Уолкоттни йиқитди. Натижада бош ҳакам пенальти белгилади. Бироқ Уолкоттнинг зарбасини дарвозабон Миньоле қайтарди!
Орадан 2 дақиқа ўтгач, Уолкотт ҳисобни очди. Ивобидан тўпни қабул қилган Тео ўткир бурчак остида зарба бериб, дарвозанинг олис бурчакни аниқ нишонга олди!
Ҳакам томонидан қўшиб берилган дақиқаларда чамаси 25 метр масофадан Коутиньо жарима зарбасини қойилмақом тарзда амалга ошириб, тўпни дарвозанинг юқори бурчагига аниқ йўллади ва ҳисобни тенглаштирди.
Иккинчи бўлимни «Ливерпуль» жуда яхши бошлади.
49-дақиқада чап қанотдан Вийналдум жарима майдонига ёриб кириб, тўпни марказдан келаётган Лалланага оширди. У эса тўпни эгаллаб олиб, яқин масофадан дарвозани аниқ ишғол этди — 1:2.
56-дақиқада Клайн ўнг қанотдан тўпни жарима майдонига етказганида, ҳимоячилар эътиборидан четда қолган Коутиньо яқин масофадан кучли зарба йўллаб, ҳисобдаги фарқни оширди - 1:3.
63-дақиқада Садьо Мане ўнг қанотдан икки ҳимоячини алдаб ўтиб, жарима майдонига кириб келиб, кучли зарба билан тўпни дарвозанинг юқори бурчагига жойлади — 1:4.
Шу заҳотиёқ «Арсенал» ҳисобни қисқартирди. Окслейд-Чемберлен худди шундай вазиятда гол уришга муваффақ бўлди.
75-дақиқада Касорла чап қанотдан белгиланган жарима зарбасини амалга оширди. Тўп жарима майдонига етказилганида ҳаммадан баланд сакраган Чемберс тўпни боши билан дарвозага йўллади — 3:4.
Аммо мўъжиза юз бермади. «Ливерпуль» ўйин охирига қадар ҳимояда яхши ўйнаб, ғалаба келтирувчи ҳисобни ушлаб қолди.
АПЛ. 1-тур. 14 август.
Арсенал – Ливерпуль 3:4 (1:1, 2:3)
Голлар: 1:0 – 31 Уолкотт, 1:1 – 45 Коутиньо, 1:2 – 49 Лаллана, 1:3 – 56 Коутиньо, 1:4 – 63 Мане, 2:4 – 64 Окслейд-Чемберлен, 3:4 – 75 Чемберс.
Арсенал – Чех, Холдинг, Чемберс, Бельерин, Монреаль, Ивоби (Окслейд-Чемберлен, 59), Эль-Ненни (Чака, 67), Уолкотт, Рэмзи (Касорла, 61), Санчес, Коклен.
Ливерпуль – Миньоле, Ловрен, Клаван, Морено, Клайн, Коутиньо (Жон, 70), Вейналдум (Стюарт, 88), Фирмино, Хендерсон, Мане, Лаллана (Ориги, 76).
Огоҳлантиришлар: Лаллана (26), Морено (29), Коклен (37), Ловрен (41), Ивоби (57), Чака (86).
