Ўзбекистонлик еттинчи боксчи мамлакатимизга медални тақдим этадиган бўлди.

52 кг. вазн тоифасида иштирок этаётган Шаҳобиддин Зоиров чорак финалда амалдаги Элвин Мамишзодани ишончли тарзда мағлубиятга учратди. Озарбойжонлик боксчи жанг бошидан ўз услубида ринг бўйлаб қочиб, қарши ҳужумда ишлашга ҳаракат қилди. Зоиров эса рақибни қувган ҳолда бўлса ҳам кўпроқ зарбалар беришга ҳаракат қилди ва буни уддалади. Биринчи раундда ҳакамлар Шаҳобиддиннинг устунлигини эътироф этишди.

Ҳисобда ортда бораётганини ҳис қилган Мамишзода иккинчи раундда ҳужумкор услубга ўтди, аммо энди қарши ҳужумда кўпроқ зарбаларни ўтказиб юборди. Учинчи раундга келиб Элвин қийин аҳволга тушиб қолди ва у концентрацияни тўла йўқотди. Ҳамюртимиз рақибини аяди шекилли, жангни нокаутгача олиб бормади. Якуний баҳолар — 30:27, 30:27, 30:27.

Шаҳобиддин Зоиров ярим финалда венесуэлалик Йеол Сегундо Финолга қарши рингга кўтарилади.

Шу тариқа, Рио-де-Жанейрога борган 10 нафар боксчимиздан 7 нафари медалларга сазовор бўладиган бўлди. Ярим финал босқичига фақатгина 3 боксчимиз чиқа олмади, холос.

Ўзбекистон делегацияси ҳисобидаги медаллар сони камида 11тани ташкил қиладиган бўлди.