Олимпиаданинг эркаклар ўртасидаги бокс мусобақасида 10 та вазн тоифаси бўлиб, Ўзбекистон делегацияси уларнинг ҳар бирида ўз спортчиси билан иштирок этди.

10 нафар ўзбекистонлик боксчининг тенг ярми якунда финалга қадар етиб борди: Ҳасанбой Дўстматов (-49 кг), Шаҳобиддин Зоиров (-52 кг), Фазлиддин Ғоибназаров (-64 кг), Шаҳрам Ғиёсов (-69 кг) ва Бектемир Мелиқўзиев (-75 кг).

Бу Рио—2016 Олимпиадасининг бокс турнирида иштирок этган мамлакатлар ичида энг яхши кўрсаткичдир. 10 та вазн тоифасидан фақатгина 1 тасида — 91 килограммдан юқори бўлган спортчилар ўртасидаги мусобақада финалчилар номи аниқланмади. Ярим финалга Франция, Хорватия, Буюк Британия ва Қозоғистон спортчилари йўл олган. Улардан исталган бири финал чиптасини қўлга киритганида ҳам Ўзбекистон терма жамоасидан яхшироқ кўрсаткич қайд эта олмайди.

Қозоғистон терма жамоаси боксчиларнинг финалда иштирок этиши борасида Ўзбекистондан кейинги ўринни эгаллади. Мамлакатнинг 3 нафар аъзоси финалга йўл олган бўлса, яна 1 нафари шу йўлда жанг қилади.

Бокс мактаби энг илғорларидан бири сифатида эътироф этиладиган Кубада ҳам финалчилар сони 3 нафарни ташкил қилди. Россиянинг икки нафар боксчиси финалда жанг ўтказиб улгурди.