Ўзбекистон терма жамоаси яримҳимоячиси Азиз Ҳайдаров Буркина-Фасога қарши ўртоқлик ўйинидан олдин ўз фикрларини баён қилди.
«ЖЧ-2018 саралашида иккинчи ва учинчи босқич орасида катта фарқ бор. Сўнгги босқич жудаям қийин бўлади, ўтган сафар тўплар нисбатига кўра финал босқичидан қолиб кетгандик.
Жамоа руҳий жиҳатдан тайёр, ҳамма футболчилар йиғилгач, рақибни ўрганишни бошлаймиз. Ҳаммамизни ниятимиз ЖЧга бориш.
Олимпиада мусобақаларини, ундаги спортчиларимизнинг ғалабаларини кўриб, мамнун бўлдик. Албатта бу бизга қўшимча куч бағишлайди.
Сурияга қарши ўйинга ҳам кўтаринки руҳда тайёргарлик кўряпмиз. Буркина Фасони ўрганиб чиқмадик, фақат Қозоғистонга қарши ўйинини кўрдик. Бу яхши, интизомли жамоа.
Ўртоқлик ўйини бўлишига қарамасдан ғалаба учун ўйнаймиз. Мухлислар биздан шуни кутишмоқда» - деди Азиз Ҳайдаров.
