Ўзбекистон ҳамда Буркина-Фасо (1:0 )терма жамоалари ўртасидаги ўртоқлик учрашувидан кейин ўтказилган матбуот анжуманининг иккинчи қисмида саволларга Ўзбекистон миллий терма жамоаси бош мураббийи Самвел Бабаян жавоб берди.
“Бугун қийин ўйин бўлди. Терма жамоалар миқёсида осон ўйиннинг ўзи бўлмайди. Учрашувда ғалабага эриша олганимиздан мамнунман ва бунинг учун йигитларга миннатдорчилик билдираман.
Ҳозирги вақтда футболчилар турлича жисмоний ҳолатда. Бизнинг асосий ўйинлар олдидан бажаришимиз керак бўлган муҳим иш – уларнинг ҳолатини мувозанатга келтириш ва жамоанинг ўйинга оптимал тайёргарлик билан етиб боришини таъминлаш. Бунинг учун бизда бир-неча кун вақт бор.
Аввалига Яман билан ўртоқлик учрашуви борасида келишувга эришгандик. Аммо юз юберган фавқулотда ҳолат бошқа рақиб топишга мажбур қилди ва қисқа вақт ичида терма жамоалар маркази Буркина-Фасо билан келишувга эришди. Ўйлайманки, бу муносиб рақиб. Ўртоқлик учрашуви учун танланган рақибдан кўнглим тўлди.
Виталий Денисовнинг ҳолатидан хабардорман. Ҳозир уни жароҳат безовта қилмаяпти ва жамоаси билан 28 августда бўладиган ўйинига тайёрланяпти.
Игор Сергеев ҳақида тўхталадиган бўлсам, ҳа, у анчадан бери гол ура олмаяпти. Бугун ҳам у гол уриши керак бўлган иккита яхши вазият бўлди ва у фойдалана олмади. Лекин мен унинг имкониятларини яхши биламан. Уни Сурияга қарши ўйингача яхши ҳолатга келиб олишига кўмаклашамиз”.
