Мустақиллик тенгдоши бўлган бекободлик Фазлиддин ўойибназаровнинг ўн ёшида боксга меҳри тушди. Йиллар давомида устозларидан бокс сирларини қунт билан ўрганди. Бунда унинг биринчи мураббийи Аброр Турсунпўлатовнинг хизматлари, айниқса, катта.
— Ҳар бир спортчимиз каби мен ҳам жаҳон майдонларида она Ватанимиз — Ўзбекистон шарафини ҳимоя қилиш имконига истиқлол шарофати билан эришганимни чуқур ҳис қиламан, — дейди Фазлиддин Fойибназаров. — Мен мана шундай юртда туғилиб, вояга етганимдан, спорт билан шуғулланиб, жаҳон спорт ареналарида Ватан шаъни учун беллашувларга кириш бахтига муяссар бўлаётганимдан фахрланаман. Жаҳон чемпионатида қўлга киритган бронза медалидан сўнг Олимпия ўйинларида олтин медаль олишни мақсад қилгандим. Чунки “Гўзал ва бетакроримсан, муқаддас Ватаним, жоним сенга фидо, Ўзбекистоним!” шиори қалбимдан мустаҳкам жой олган. У менга куч-қувват берди. Юртдошларим ва мураббийларим ишончини оқлаганимдан бахтиёрман.

Шу ўринда боксчи сифатида муваффақиятларга  эришишимда мен каби минг-минглаб спортга ошно йигит-қизларнинг  бошини силаб, барчамизга оталарча ғамхўрлик кўрсатаётган Президентимизга миннатдорчилигимни билдирмоқчиман. Бунга жавобан Олимпиадада байроғимизни баланд кўтарганимдан, юртим шарафини муносиб ҳимоя қилганимдан фахрланаман. Бу ҳали ҳаммаси эмас. Fалабаларимиз бардавом бўлсин!

Тўмарис Аъзам,
“Milliy tiklanish” мухбири