Футзал бўйича Колумбияда бўлиб ўтадиган Жаҳон чемпионатида иштирок этадиган Ўзбекистон терма жамоаси аъзолари ва мураббийлари иштирокида йиғилиш ўтказилди.
Дастлаб, терма жамоа бош мураббийи Хосе Мария Мендес ҳамда терма жамоа сардори Артур Юнусов иштирокида матбуот анжумани ўтказилган бўлса, йиғилишнинг иккинчи қисмида Ўзбекистон Футбол Федерецияси президенти Мираброр Усмонов терма жамоа аъзолари ва мураббийлар штаби билан учрашди.
Йиғилишда сўзда чиққан ЎФФ президенти сентябрь ойида Колумбияда старт оладиган жаҳон чемпионати баҳсларида Ўзбекистон терма жамоаси муносиб иштирок этишини ва юртимизга яхши натижа ва ғалабалар билан қайтишини тилади. “Футзал мамлакатимизга кириб келганига кўп вақт бўлгани йўқ, аммо сўнгги йилларда футзалда Ўзбекистон анча катта ютуқларга эришди. Ушбу спорт турини Ўзбекистонда ривожлантириш учун кенг кўламли ишлар амалга оширилди. Мамлакатимиз футзал бўйича бир қатор йирик мусобақаларга мезбонлик қилди. Асосийси, ушбу спорт тури билан шуғулланадиган ёшлар кўпайди. Натижа кўп куттиргани йўқ ва мана, Ўзбекистон терма жамоаси жаҳоннинг энг кучли жамоаларига қарши Жаҳон чемпионатида ўйнаш ҳуқуқини қўлга киритди”, - деди Мираброр Усмонов.
“Колумбияда бўлиб ўтадиган жаҳон чемпионатида юртимиз шаънини муносиб ҳимоя қилишингиз ва мамлакатимизда ҳукм сураётган байрамона кайфиятни янада кўтаришингизни тилайман. Футзал орқали Ўзбекистонни дунёга танитишингизни тилайман”, - деди ЎФФ президенти Ўзбекистон футзал терма жамоаси аъзоларига.
Ўзбекистон футзал терма жамоасини Жаҳон чемпионатига кузатиш маросимида шунингдек, Ўзбекистон Футбол Федерацияси, Ўзбекистон Футзал Уюшмаси раҳбарияти ҳамда бир қатор мутаххассилар ва мураббийлар иштирок этишди ва улар ҳам терма жамоа аъзоларига Жаҳон чемпионати баҳсларида омад тилашди. Ўз навбатида Жаҳон чемпионатига йўл олаётган терма жамоа аъзолари ҳам, мундиалда муносиб иштирок этишларини ва бунинг учун қаттиқ мехнат қилишларини айтиб ўтишди.
