Олмалиқ шаҳрида туғилган ва кейинчалик Германияга кўчиб кетган, айни пайтда «Ҳанновер 96» клубида тўп сураётган футболчи Вальдемар Антон Ўзбекистон терма жамоасида ўйнамайдиган бўлди.
Футболчи Европа чемпионатига тайёргарлик кўраётган Германия U21 терма жамоасининг йиғинига таклиф олди.
«Бу чақирув Вальдемар ва «Ҳанновер 96» клуби учун катта шарафдир. Шунингдек унинг ва бизнинг меҳнатларимиз учун мукофотдир» - деди клубнинг спорт директори Мартин Бадер.
«Вальди» 2 сентябрь куни Словакия ёки 6 сентябрь куни Финляндия ёшларига қарши ўйинда Германия таркибида дебют қилиши мумкин. Агар бу иш амалга ошса, уни Ўзбекистон терма жамоасига жалб қилишнинг имкони бўлмайди.
