Энг улуғ, энг азиз байрам арафасида Наманган шаҳрида “Аёллар комплекси” спорт-соғломлаштириш мажмуаси фойдаланишга топширилди.

“Соғлом она ва бола йили” Давлат дастури ижроси доирасида қуриб битказилган мажмуанинг очилиш маросимида Президентимиз раҳнамолигида оналар ва болалар саломатлигини муҳофаза қилиш, хотин-қизларнинг ижтимоий мавқеини янада мустаҳкамлаш ва фаоллигини оширишга қаратилаётган алоҳида эътибор юксак самаралар бераётгани таъкидланди.

“Дўстлик” масъулияти чекланган жамияти томонидан барпо этилган мажмуада хотин-қизларнинг руҳан тетик ва жисмонан соғлом бўлишини таъминлашга қаратилган сервис хизматлари кўрсатиш имконияти яратилди. Мажмуанинг тўрт қаватли муҳташам биноси ва ўзига хос микроиқлим ҳосил қилинган ҳовлисида фитнес, шейпинг, сауна, бассейн, фитобар, физиотерапия хоналари, замонавий тренажёрлар билан жиҳозланган спорт зали фаолияти йўлга қўйилган. Бу ерда хотин-қизлар малакали мутахассислар кўмагида саломатлигини тиклаши, профилактик муолажа олиши ва “Гўзаллик салони”, косметология хоналаридан кенг фойдаланиши мумкин. Шунингдек, турли жисмоний машқ ва муолажалардан сўнг дам олиш хоналари ташкил қилинган. Ошхона, тўй либослари хонаси ҳам ишлаб турибди. Истиқболда бу ерда махсус буюртмалар асосида кийим-кечак тикишга ихтисослашган модалар ательесини ишга тушириш ҳам режалаштирилган.

– Президентимиз раҳнамолигида хотин-қизлар саломатлигини мустаҳкамлашга алоҳида эътибор қаратилаётгани келажак йўлидаги эзгу мақсадлар ифодасидир, – дейди муассасанинг тренер-инструктори Гулноза Эралиева. – Зеро, аёллар саломатлиги ва гўзаллиги жамият кўрки бўлиши билан бирга, соғлом ва баркамол авлоднинг, ижтимоий фаолликнинг бош омили ҳамдир. Мажмуада хотин-қизлар ўртасида соғлом турмуш тарзини назарий ва амалий тарғиб қилиш учун барча зарур шароитлар яратилган.

Спорт-соғломлаштириш мажмуасининг фойдаланишга топширилиши билан 35 янги иш ўрни яратилди.