Бугун олий лиганинг 21-тур учрашувларига старт берилади. "Локомотив" ўз майдонида Ғузорнинг "Шўртан" клубига қарши баҳс олиб боради.
Олий лига, 21-тур. 9 сентябрь
ЛОКОМОТИВ - ШЎРТАН
Бош ҳакам: Олим Толибжонов
Турнир жадвалидаги ўрни: "Локомотив" 1-ўринда (49 очко), "Шўртан" 11-ўринда (20 очко).
Очколар орасидаги фарқ - 29 очко.
Таъриф: Аслида "Шўртан" ҳозиргача 23 очко тўплаганди, бироқ ПФЛ қарорига кўра клубдан 3 очко олиб ташланган. Бугун иккала жамоа иштирокида чиройли футбол кечиши кутилмоқда. Албатта, ўйинда "Локо" фаворит, аммо "Шўртан" ҳам анойилардан эмас. Бу жамоа ўтган тур 1:2 ҳисобида мағлубиятга учраётиб, якунда 3:2 ҳисобида зафар қучганини унутмаслик лозим.
Факт: Биринчи даврада Ғузорда кечган баҳсда "темирйўлчилар" 2:0 ҳисобида зафар қучишганди. "Локо" сафида Тимур Кападзе билан Сервер Жепаров гол муаллифи бўлишган.
Факт: "Локомотив" олий лигада ўз майдонида 10та учрашув ўтказиб, шундан 9тасида ғалаба қозонган ва бир марта дуранг ўйнаган. Тўплар нисбати 29-4. "Шўртан" эса сафар баҳсларида 10та учрашувда майдонга тушиб, икки бор зафар қучган. Бир марта дуранг ўйнаб, 7 марта мағлуб бўлган. Тўплар нисбати 16-23.
Факт: "Локомотив" иккинчи даврада тўртта учрашув ўтказиб, учтасини ғалаба билан якунлади. "Шўртан" эса бешта ўйиндан иккитасида зафар қучди ва уч бор мағлубиятга учради.
Эслатма: "Дўстлик" стадионида кеча ўтказилган Ёшлар лигаси баҳсида кучлар тенг келди. "Локомотив" - "Шўртан" 2:2.
