Олий лиганинг 21-тури доирасида "Локомотив" ўз майдонида "Шўртан"ни қабул қилди ва йирик ҳисобда ғалаба қозонди. Учрашувдан кейин мезбонлар бош мураббийи Андрей Микляев ўз фикрлари билан ўртоқлашди.

"Жамоамиз 3 очкони қўлга киритганидан хурсандман. Лекин биринчи бўлимда ўзимиз истаганимиздек ўйин намойиш эта олмадик. Иккинчи бўлимда эса ташаббус биз томонга ўтди ва ғалаба қўлга киритилди.

Олдинда бизни жуда муҳим учрашув кутиб турибди. Рақиб эса кимсан - "Ал-Айн"! Бу учрашувга жуда жиддий эътибор қаратмоқдамиз ва тайёргарлик давом этмоқда.

Шу ўринда таъкидлаш жоизки, ҳозирда "Бунёдкор" стадиони майдони ҳолати унча яхши эмас. Бу ҳолат бизни бироз хавотирга солмоқда. Умид қиламизки, стадион ҳодимлари майдон ҳолатини ўйинга қадар яхши аҳволга келтира олишади.

Таркибимизда йўқотишлар бор. Славен Степанович жароҳат олган. У тиббий кўрикдан ўтди. Эндиликда натижаларни кутяпмиз. Умид қиламанки, Славен ҳали таркибга қайтади ва жамоамизга наф келтиради", - деди Микляев.