41 ёшли бразилиялик Жоау Майя Рио Паралимпиадасида съёмка олиб бориш учун аккредитация олган биринчи кўзи ожиз сураткаш бўлди. Бу ҳақда TJournal хабар бермоқда.

Фотография санъатига қизиққунига қадар Майя Сан-Паулуда почтачи бўлиб ишларди. У 28 ёшида — кўз соққаси томирли пўстлоғи яллиғланиши билан боғлиқ увеит инфекциясини бошдан кечирганидан сўнг кўриш қобилиятини йўқотди. Ҳозир Майя объектларга максимал даражада яқинлашиб, айрим шакл ва рангларни ажрата олади.

Кўз нури йўқолгач, Майя ҳасса билан юра бошлади ҳамда Брайль тизими бўйича ўқиди. Айнан ўша пайтда у сурат олишга қизиқа бошлади.

«Суратга олиш учун кўриш қобилияти бўлиши шарт эмас. Менинг кўзларим — юрагимда», — дейди Майянинг ўзи.

Оддий камерада суратга олишни бошлаган Жоау ҳозир смартфондан фойдаланади. У баъзан атрофидаги одамлардан спортчи қандай кийинган ва қандай кўринишда эканлигини сўраб олади.

Шунингдек, айрим кўзи кўрадиган одамлар унинг суратларини қайта ишлаб, Instagram’га юклаш йўли билан унга ёрдам беради.

Майя 2020 йили Токиода ўтадиган навбатдаги Паралимпия ўйинларига ҳам боришни режалаштирмоқда.