Англия футбол уюшмаси (FA) The Telegraph нашри суриштирувидан сўнг очилган коррупция иши бўйича полиция билан маслаҳатлашади. Бу ҳақда, The Guardian газетасига асосланиб, «ТАСС» хабар бермоқда.

Аввалроқ The Telegraph нашри томонидан уюштирилган ҳамда Англия футболида коррупция ва порахўрлик далилларини топишга қаратилган 10 ойлик махсус суриштирувда Англия терма жамоаси бош мураббийи Сэм Эллардайс коррупцияга алоқадорлиги фош этилган эди. Натижада, 27 сентябрь куни мутахассис ва FA ўртасидаги шартнома томонларнинг розилиги билан бекор қилинди.

«Англия футбол уюшмаси The Telegraph газетаси билан ҳамкорлик қилмоқда. Ассоциация бундай айбловларга жиддий эътибор беради ва тегишли органлар билан суриштирув ишларини олиб боради. Биз газетанинг барча материаллари тақдим этилишини сўрадик, улар яқин орада етказилади. FA ушбу ишни кечиктирмасдан тергов қилишни истайди. Шу сабабли, душанба куни биз Лондон полицияси билан учрашамиз», — дейилади FA хабарида.

The Telegraph газетаси, Сэм Эллардайсдан ташқари, «Куинз Парк Рейнжерс» бош мураббийи Жимми Флойд Хассельбайнк, «Лидс» клубининг италиялик хўжайини Массимо Челлино, «Барнсли» жамоасининг истеъфога чиқарилган бош мураббий ёрдамчиси Томми Райт ва «Саутгемптон» бош мураббийи ёрдамчиси Эрик Блэкни ҳам коррупцияда айблади.