1news.uz — Жаҳон чемпионати саралашининг учинчи босқичи доирасида “А” гуруҳидан ўрин олган 6 октябрь куни Тошкентда бўлиб ўтадиган Ўзбекистон ва Эрон миллий терма жамоаларининг учрашувига қизиқиш жуда ҳам катта.
Бугундан “Бунёдкор” стадиони кассаларида ушбу учрашувга чипталар сотуви йўлга қўйилиши биланоқ футбол мухлислари “бугунги ишни эртага қўйма” қабилида иш тутмоқдалар.
Зеро, ўйиннинг аҳамияти, унда жароҳат туфайли жамоа сардори Одил Аҳмедовнинг иштирок этолмаслиги, шундай бўлса-да йигитларимиз юрт-Ватан шаъни учун бор куч ва иқтидорларини беришга тайёрликлари, навбатдаги ғалаба йўлида ишқибозларнинг қўллаб-қувватлашлари нечоғлик зарурлиги ҳақида ҳамма юрак-юраги билан ҳис қилиб турибди.
Бу ўйиндаги ғалаба Ўзбекистон терма жамоасининг 11 октябрда Тошкентда бўлиб ўтадиган Жанубий Кореяга қарши ўйинbда бизнинг йигитларга руҳий устунликни бериши ҳам бор гап.
“ҲАҚИҚИЙ ФАНАТЛАР!!!! ОМАД ЁР БЎЛСИН ЎЗБЕКИСТОН ТЕРМАСИГА”, – деб ёзмоқда Фейсбукдаги “Водители Ташкента” гуруҳи фойдаланувчиси.
