Англиянинг «Манчестер Сити» футбол клуби ёш футболчиларга турли рангдаги бутсалар кийишни тақиқлади. Бу ҳақда Mirror нашрига таяниб, «ТАСС» хабар бермоқда.
Футболчиларга фақат қора рангли бутсаларда майдонга тушишга рухсат берилди. «Манчестер Сити» академияси бош мураббийи Жейсон Уилкокснинг сўзларига кўра, клуб нафақат яхши футболчилар етиштириши, балки ўйинчиларнинг шахсий ривожланишида иштирок этиши керак.
«Яхши футболчи бошқа одамларни ҳурмат қилмаслигини кўриш мен учун энг ёмони. Сизда мақсад бўлиши керак, лекин барибир одамларга нисбатан ҳурматли бўлишингиз лозим. Бола ким билан гаплашишидан қатъи назар, у фаррош бўладими ёки бош директор, ундан ҳурмат кўрсатишни талаб қиламиз», – деди Жейсон Уилкокс.
Олдинроқ «Манчестер Сити» бош мураббийи Пеп Гвардиола асосий жамоа футболчиларига интернетдан фойдаланишни тақиқлагани ҳақида хабар берилган эди.
