Ўзбекистон — Хитой ўртасидаги 11 октябрь куни бўлиб ўтадиган ўйин олдидан мезбонлар бош мураббийи Самвел Бабаян матбуот анжуманида иштирок этди ва журналистлар саволларига жавоб қайтарди. Бунда унинг ёнидан терма жамоа вице-сардори Сервер Жепаров жой олди.

«Хитойни етарли даражада ўрганиб чиқдик. Таркибида ажойиб футболчилари бор. Хитой чемпионатида юлдузлар тўп сурмоқда, ички биринчилик кучайган. Эртага яхши ўйинимизни кўрсатиб, зафар қучиш учун яхши тайёргарлик кўрдик», — деб таъкидлади Самвел Бабаян.

Журналистларнинг Ислом Тўхтахўжаев, Сардор Рашидов ва Игорь Сергеевнинг ўрнига бошқа футболчиларни ҳам жалб қилиш мумкинми, деб берилган саволига ўзбекистонлик мутахассис қуйидагича жавоб берди:

«Учала футболчи ҳам ўз ишининг устаси. Улар термада ўйнашга ҳақли эканини исботлаб бўлган. Хато ва камчиликлар бўлаётгани рост, бироқ бу билан уларнинг олдинги меҳнатларини унутиш керак эмас. Ёш футболчилар матбуотдаги танқидларни ўқийди ва бу уларга ёмон таъсир қилади».

Фикрининг якунида Самвел Бабаян Ўзбекистон терма жамоасининг тактикасини тушунтириб ўтди: «10 футболчи ҳужумда, 10 футболчи ҳимояда».

Маълумот учун, 10 футболчиси ҳужумда ўйнайдиган Ўзбекистон миллий терма жамоаси Эронга қарши беллашувда дарвоза томон бирорта аниқ зарба бера олмаганди.