Бугун 25-турнинг маразий учрашуви ҳисобланган “Бунёдкор” – “Насаф” учрашуви бўлиб ўтади. Учрашув Тошкент шаҳридаги муҳташам “Бунёдкор” стадионида соат 17:00да бошланади.

Мазкур учрашувга бўлган қизиқиш жуда юқори. Бунга бир қанча сабаблар бор. Жумладан, турнир жадвалида ёнма-ён бораётган ушбу жамолар бугун йигирманчи бор куч синашишади. Юқори ўринлар учун кураш олиб бораётган ҳар иккала жамоа учун бугунги учрашув жуда катта аҳамиятга эга.

Яқин ўтган мавсумларда мазкур жамоалар иштирокидаги учрашувларда кучлар тенг келмоқда.

“Насаф”нинг Тошкентда “Бунёдкор” устидан ғалабаси 2014 йилги мавсумда қайд этилган. “Бунёдкор” жамоаси “Насаф”ни сўнгги бор Тошкентда 2013 йилги мавсумда мағлуб эта олган.

Рўзиқул Бердиев бугунги учрашувда ўз шогирдларини чемпионатимизда 116-марта майдонга бошлаб тушади. Шогирдлари бугун унга фаолиятидаги 75-ғалабани туҳфа қилишлари мумкин. Бердиев ўз шогирдларини бу ўйинга ҳар қачонгидан пухта тайёрлади. “Аждарлар” бу ўйинга ҳар томонлама тайёр туришибди.

Мазкур жамоаларнинг Тошкентдаги  бугунги 10-туқнашуви қандай натижа билан якунланади. Буни учрашувдан кейин билиб оламиз.

Ўзбекистон Профессионал Футбол Лигаси ушбу марказий учрашувни бошқариб боришни, нафақат мамлакатимиз балки жаҳоннинг энг тажрибали рефериси бўлмиш Равшан Эрматовга ишониб топширган.

Бугун шунингдек, ўз севикликларини ҳар томонлама қўллаб-қувватлаш учун Қарши шаҳридан ҳам кўплаб ишқибозлар ташриф буюришади. Бундан ташқари Тошкентда таълим олаётган ва ишлаётган кўпсонли футбол ишқибозлари ҳам жамоамизга ишқибозлик қилиш истакларини билдиришган.

Маълум сабаблар билан стадионга ташриф буюр олмаган мухлислар, ушбу учрашувни “Sport” телеканали орқали ҳам томоша қилиш имкониятига эга бўлишади. Учрашув тўғридан-тўғри намойиш этилади.

Демак, бугун футбол! Миллий чемпионатимизнинг икки энг кучли жамоасидан чиройли ва мазмунли ўйин кутиб қоламиз.