Хабарингиз бор, яқинда пойтахтимизда киберфутбол бўйича жаҳон чемпионати саралаш учрашувлари бўлиб ўтган эди.
Киберфутбол бўйича жаҳон чемпионатига ажратилган ягона йўлланмани ўтиш турнирида муваффақиятли иштирок этган “Бунёдкор” киберфутболчиси Муҳаммадамин Турғунбоев (Ali_Bebeto) қўлга киритган эди.
29-31 октябрь кунлари Франциянинг Парих шаҳрида 32та киберфутболчи 2016 йилда жаҳоннинг энг кучли виртуал футболчиси номига ойдинлик киритишади.
Ўзбекистон номидан турнирда иштирок этадиган Муҳаммадамин Турғунбоев (Ali_Bebeto) айни пайтда Парижда бўлиб турибди ва жаҳон чемпионати олдидан тайёргарликнинг сўнгги босқичини олиб бормоқда. Спортчимизга Францияда киберфутбол ассоциацияси раҳбари Азизбек Паттахов хамроҳлик қилмоқда.
Киберфутбол бўйича жаҳон чемпионатида 32та спортчи 4та гуруҳга 8тадан тақсимланган ҳолда иштирок этади. “Плей-офф” босқичига ҳар бир гуруҳдан 4тадан (жами 16та) иштирокчи йўлланма олади. Кейин эса олимпия тизимида кучлилар сараланиб борилади. Муҳаммадамин Турғунбоев (Ali_Bebeto) жаҳон чемпионатидаги иштирокини 29 октябрь куни англиялик Spencer “Gorilla” никли киберфутболчига қарши баҳс билан бошлайди.
Қайд этиш керакки, киберфутбол бўйича жаҳон чемпионатининг умумий соврин жамғармаси 15 минг АҚШ долларини ташкил этади: 1-ўрин – 8.000, 2-ўрин – 4.000, 3-ўрин – 2.000, 4-ўрин – 1.000.
Киберфутбол бўйича жаҳон чемпионати баҳсларини www.eswc.com сайти орқали он-лайн кузатиб боришингиз мумкин.
