Бугун олий лига 27-тур ўйинлари доирасида “Локомотив” Қаршининг “Насаф” клубига қарши баҳс юритди ва қизиқарли тарзда кечган учрашувда 3:2 ҳисобида чиройли ғалабага эришди.
Ўйиндан кейин ўтказилган матбуот анжуманида “Локомотив” устози Андрей Микляев қуйидагича фикр билдирди:
- Учрашувни ёмон бошламадик. Иккита гол киритишни ҳам уддаладик. Лекин ҳимояда йўл қўйилган хатолар сабаб ўз дарвозамиздан ҳам икки бор тўп ўтказиб юбордик. Аммо йигитлар ўзларини йўқотиб қўйишмади, улар руҳан “синиб” қолишмади ва якунда ғалаба тўпини уриш бизга насиб этди.
Айни пайтда биз мавсум якуни арафасида турибмиз. Бутун мавсум давомида мунтазам майдонга тушиб келган ўйинчиларга бироз дам олиш имконини тақдим этяпмиз. Масалан, Темур Кападзе эндиликда ёш футболчи эмас. Қолаверса у деярли ҳар ўйинда майдонга тушиб келмоқда. Охирги пайтларда тез-тез ўйин ўтказганимиз сабабдан уни бугун ҳам захирадан майдонга туширишга қарор қилдик.
Шунингдек, Бикмаев ҳам “Бунёдкор” билан ўйинда ўзидан яхши таассурот қолдира олгани учун илк дақиқалардан ўйнади. Геворкян эса захирада қолди. Артурни ўйиннинг кечишига қараб иккинчи бўлимда майдонга туширмоқчи эдик.
Умуман олганда, ўйин анча томошабоп кўриниш олди. Ғалаба қўлга киритганимиздан мамнунман ва бунинг учун йигитларга миннатдорчилик билдираман, - дейди тажрибали мутахассис.
