Россиянинг «Парма» баскетбол клуби шифокори Андрей Буторин самолёт йўловчисининг ҳаётини сақлаб қолди. Бу ҳақда жамоанинг ижтимоий тармоқдаги саҳифасида маълум қилинди, деб хабар беради «ТАСС».
Пермь вилояти жамоаси ЦСКА клуби билан ўйинга учиб кетаётганида йўловчилардан бирининг тоби қочди. Саратон касаллигига чалинган аёлнинг боши айланди ва қон босими тушиб кетди. Унинг ҳолатини гормон уколи ёрдамида меъёрга келтиришга муваффақ бўлинди. Самолёт Москвага қўнганидан сўнг аёлни тез тиббий ёрдам машинаси олиб кетди.
ЦСКА ва «Парма» ўртасидаги ўйин 13 ноябрь, якшанба куни бўлиб ўтади.
