2015 йилда футболчилик фаолиятини якунлаб, яқин кунларда Жанубий Корея терма жамоасида мураббийлик фаолиятини бошлаган Ча Ду Ри ЖЧ-2018 саралаш босқичида Ўзбекистонга қарши ўйин олдидан бир ишга қўл ургани маълум бўлди.

Мутахассис Эронга қарши ўйиндаги мағлубиятдан кейин руҳий тушкунликка тушган футболчиларнинг кайфиятини кўтаришга ҳаракат қилди. Ча Ду Ри Корея футбол ассоциациясига таклиф киритиб, терма жамоанинг аввалги футболчилари иштирокидаги ўйинлардан видеоролик тайёрлатди. Канадага қарши ўйин олдидан ушбу видеоклип футболчиларга қўйиб берилди ва унинг сўнгида "Ҳеч қачон унутманг, сиз кўплаб инсонларга умид бериш масъулиятни ўз зиммангизга олган буюк футболчиларсиз", - деган ёзув чиқарилди. Ча Ду Ри бу орқали футболчилардаги иштиёқни оширишга ҳаракат қилди.

Ушбу чора-тадбир кореяликларга ижобий таъсир кўрсатди чоғи, улар ўйин давомида ҳисобда ортда бораётиб, баҳс тугашига 5 дақиқа қолганида ғалабани ўз томонларига оғдиришди.