"Манчестер Сити" бош мураббийи Хосеп Гвардиола чемпионлар лигаси учун ўйинчилар рўйхатига ивуарлик яримҳимоячи Яҳё Турени қўшмай, хато қилганини тан олди.
Туре АПЛнинг 12-турида "Кристал Пэлас"га қарши учрашувда (2:1) биринчи марта майдонга тушди ва "дубль"га эришди. Шундан сўнг мураббий уни январь ойида ЕЧЛ "заявка"сига қўшиши мумкинлигини маълум қилди.
"Ҳа, бу бўлиши мумкин. Балки, мен мавсум бошида хато қилгандирман, аммо фикримга қўшилмаганларни ҳам ҳурмат қиламан. Мен Яҳё билан кўп суҳбатлашаман, ахир у билан "Барселона"да ҳам бирга ишлаганман. Мен уни жуда яхши биламан, унинг ўйин савиясига шубҳа қилмайман. Агар "Сити" чемпионлар лигасининг 1/8 финалига йўл олса, ёрдамчиларим билан маслаҳатлашаман", - дейди Гвардиола.
"Манчестер Сити" ЕЧЛнинг С гуруҳида 4 ўйиндан сўнг 7 очко жамғариб, иккинчи ўринда бормоқда.
