«Насаф» янги мавсум тайёргарликларининг иккинчи босқичини Қарши шаҳридаги ўз қароргоҳида давом эттирмоқда.

Ҳозирча Шуҳрат Муҳаммадиев жамоани тарк этган. У энди Тошкентнинг “Локомотив” жамоаси таркибида фаолиятини давом эттиради. Шунингдек янги мавсумдан жамоа сафида Азамат Алланиёзов, Ильдар Маматказин ҳам фаолият юритмайдиган бўлишди. Бу футболчилар энди бошқа клубларда тўп тепади.

Қолган барча маҳаллий футболчилар билан янги шартномалар тузилди. Шунингдек янги мавсумдан жамоанинг асосий таркибида бир қатор ёш футболчилар ҳам тўп тепишади - Ислом Кенжабоев, Наврўзжон Изатиллаев.

Шуни алоҳида таъкидлаш жоизки, кейинги йилларда клуби қошидаги футбол мактабидан кўплаб иқтидорли ёш футболчилар етишиб чиқмоқда. Шуни ишонч билан айтиш мумкинки, бундай ёш футболчилар бу йилги футбол мавсумида футбол ишқибозларининг эътирофига сазовор бўлишади.

Легионер футболчилари Драган Черан ва Игор Голбан янги мавсумда ҳам жамоа шарафини ҳимоя қиладиган бўлишди. Бу футболчилар билан ҳам янги шартномалар имзоланган. Яна бир легионер Огнен Красич билан яқинда ўзаро келишувга эришилди. У шу кунларда жамоа таркибига келиб қўшилади.

Жамоа режага кўра, 7 январ куни хорижий йиғинга жўнаб кетади. У ерда икки ҳафта мобайнида янги мавсум тайёргарликларининг учинчи босқичи бўлиб ўтади. Ана шу тайёргарлик жараёнида мураббийлар янги футболчиларни ҳам кўрикдан ўтказиши мумкин.

Мураббийлар хорижий йиғин давомида 6та ўртоқлик учрашувлари ҳам ўтказишни режалаштиришган. Бу ҳақда кейинроқ тўлиқ маълумот берамиз.