Испания чемпионатининг 18-тури доирасида бўлиб ўтган "Севилья" ва "Реал" жамоалари ўртасидаги ўйин драматик сценарий асосида ўтди. Андалусияликлар Кубок доирасидаги мағлубият, сўнгги дақиқаларда қўлдан чиқарилган ғалаба учун "Мадрид"дан қасос олишга муваффақ бўлди.

Зидан бугунги ўйинга 3-5-2 тактик схемаси асосида ўйнашга қарор қилди. Орқада 3 ҳимоячини қолдириб, Марсело ва Карвахални ярим ҳимояга ўтказди. Олдинда эса Роналду ва Бензема соф ҳужумчи сифатида ҳаракат қилишди.

Учрашув бир соатдан бироз ошиқроқ вақт давомида асосан тактик кураш остида ўтди. Жамоалар олдинга ўтишди, аммо катта куч билан эмас. Юзага келган унчалик кўп бўлмаган вазиятлардан эса футболчилар фойдалана олишмади.

Баҳснинг 64-дақиқасида Карвахаль ўнг қанотдан жарима майдончасига ёриб кирди, тўпга ташланган "Севилья" дарвозабони Даниэлни йиқитди. Белгиланган пенальтини Криштиану Роналду аниқ амалга ошириб ҳисобни очди.

Ўйин "Реал"нинг ғалабаси билан якунланаётгандек кўринган вазиятда, бутун баҳс давомида "Рамон Санчес Писхуан"га йиғилган мухлисларнинг ҳуштакбозлиги остида ўйнашга мажбур бўлган Серхио Рамос қўпол хатога йўл қўйди. Жаримадан етказилган узатмани "Мадрид" сардори бош билан дарвозага тўғрилаб қўйди.

Голдан руҳланган андалусияликлар кетма-кет ҳужум қила бошладилар ва улар ғалабани тўпини киритишга муваффақ бўлдилар. Қўшиб берилган дақиқаларда Стефан Йоветич олис масофадан аниқ зарба билан дарвозани ишғол қилди!

Шу тариқа, "Севилья" "Реал"нинг 40та ўйиндан иборат мағлубиятсиз сериясига нуқта қўйди ва жадвалда 2-ўринга кўтарилиб олди. Энди "Қироллик клуби"дан "Севилья" 1, "Барселона" 2 очко ортда қолмоқда. Албатта, мадридликлар ҳисобида битта қолдирилган ўйин бор.

Испания Ла лигаси, 18-тур.
"СЕВИЛЬЯ" - "РЕАЛ МАДРИД" - 2:1 (0:0, 2:1)
Голлар: 0:1 – 67, пенальти Роналду, 1:1 – 85, автогол Рамос, 2:1 – 90 Йоветич.
Севилья – Рико, Пареха, Эскудеро, Мариано, Рами, Насри, Иборра (Сарабия, 77), Витоло, Нзонзи, Васкес (Йоветич, 68), Бен-Йеддер (Вьетто, 90).
Реал Мадрид – Навас, Варан, Рамос, Начо, Марсело, Модрич, Каземиро, Кроос (Ковачич, 75), Карвахаль, Бензема, Роналду.
Огоҳлантиришлар: Иборра (31), Нзонзи (42), Насри (81), Марсело (84).