Бугун Россияда «Мухлис паспорти»ни илк эгаларига топшириш маросими ўтказилди. Усиз Конфедерациялар кубоги – 2017 ва Жаҳон чемпионати – 2018 ўйинларини томоша қилиш имконияти бўлмайди.
Мухлис паспорти ёки FAN ID – эгасининг исми, фамилияси кўрсатилган, фотосурати жойлаштирилган, шунингдек магнит тасмасига эга бўлган пластик карточкадир.
Ўйинлар ўтказиладиган стадионга кириш учун мухлислар чипта билан бирга «мухлис паспорти»га ҳам эга бўлиши шарт. Агар чипта қўлингизда бўлсаю, «мухлис паспорти»га эга бўлмасангиз стадионга киролмайсиз.
«Мухлис паспорти»нинг ҳар бир эгаси махсус маълумотлар базасига киритилади ва шаҳар ичидаги транспортда, шунингдек ўйинлар ўтказиладиган шаҳарлараро поездларда мутлақо бепул ҳаракатланиш ҳуқуқига эга бўлади.
Бундан ташқари, стадионда ва унинг атрофида амалга оширилган қоидабузарликлар бу паспортга киритиб борилади. Агар безорилик қилинса, ундан маҳрум қилинади.
«Мухлис паспорти»ни олиш учун олдин ўйин чиптаси сотиб олиниши шарт. Шундан сўнг махсус сайтда рўйхатдан ўтиш лозим. Жараён жуда оддий – фуқаролик паспорти маълумотлари киритилади, фотосурат юкланади ва «мухлис паспорти»ни етказиш усули танланади. Уни махсус марказларда олиш мумкин ёки почта орқали етказиб берилади.
Муҳим эслатма, «Мухлис паспорти»ни фақат чипта харид қилинганидан сўнг олиш мумкин. Бундан ташқари, чиптаси бор, лекин «мухлис паспорти»га эга бўлмаганлар стадионга киритилмайди.
