Bugun Rossiyada «Muxlis pasporti»ni ilk egalariga topshirish marosimi o‘tkazildi. Usiz Konfederasiyalar kubogi – 2017 va Jahon chempionati – 2018 o‘yinlarini tomosha qilish imkoniyati bo‘lmaydi.

Muxlis pasporti yoki FAN ID – egasining ismi, familiyasi ko‘rsatilgan, fotosurati joylashtirilgan, shuningdek magnit tasmasiga ega bo‘lgan plastik kartochkadir.

O‘yinlar o‘tkaziladigan stadionga kirish uchun muxlislar chipta bilan birga «muxlis pasporti»ga ham ega bo‘lishi shart. Agar chipta qo‘lingizda bo‘lsayu, «muxlis pasporti»ga ega bo‘lmasangiz stadionga kirolmaysiz.

«Muxlis pasporti»ning har bir egasi maxsus ma’lumotlar bazasiga kiritiladi va shahar ichidagi transportda, shuningdek o‘yinlar o‘tkaziladigan shaharlararo poyezdlarda mutlaqo bepul harakatlanish huquqiga ega bo‘ladi.

Bundan tashqari, stadionda va uning atrofida amalga oshirilgan qoidabuzarliklar bu pasportga kiritib boriladi. Agar bezorilik qilinsa, undan mahrum qilinadi.

«Muxlis pasporti»ni olish uchun oldin o‘yin chiptasi sotib olinishi shart. Shundan so‘ng maxsus saytda ro‘yxatdan o‘tish lozim. Jarayon juda oddiy – fuqarolik pasporti ma’lumotlari kiritiladi, fotosurat yuklanadi va «muxlis psporti»ni yetkazish usuli tanlanadi. Uni maxsus markazlarda olish mumkin yoki pochta orqali yetkazib beriladi.

Muhim eslatma, «Muxlis pasporti»ni faqat chipta xarid qilinganidan so‘ng olish mumkin. Bundan tashqari, chiptasi bor, lekin «muxlis pasporti»ga ega bo‘lmaganlar stadionga kiritilmaydi.