Шу кунларда Тошкент шаҳрида қиличбозлик бўйича Ўзбекистон чемпионати мусобақаси бўлиб ўтмоқда. 16 ёшгача бўлган ёш спортчилар орасида ўтаётган турнирда Республикамизнинг турли вилоятларидан ташриф 300 га яқин иштирокчи ўз кучини синаб кўрмоқда.

Бугунги кунда Ўзбекистон Қиличбозлик Федерацияси мамлакатимизнинг барча вилоятларида фаоллик билан иш олиб бормоқда. 2 феврал куни Тошкентдаги “Қиличбозлик мажмуасида” старт олган Ўзбекистон чемпионати 16 ёшгача бўлган спортчилар орасидан кучлиларни сараламоқда. Турнир 3 йўналишда – шамшир, рапира ҳамда шпага бўйича бўлиб ўтмоқда. Ҳозирда барча йўналишларда саралаш баҳслари давом этмоқда. Жумладан, 4 феврал куни рапира бўйича яккалик баҳсларида тўқнашувлар ўтказилди. Қиличбозлик спорт тури ёшлар орасида оммалашиб борар экан Ўзбекистон Қиличбозлик Федерация ушбу спорт тури билан шуғулланувларга барча имкониятлар яратиш учун ҳаракат қилмоқда. Ҳозирда, Ўзбекистон терма жамоасининг турли ёшдаги таркиблари Германия, Полша ва Россия каби ушбу спорт турида етакчи бўлган мамлакатларда мусобақаларда иштирок этиш ҳамда мазкур мамлакатлардаги қиличбозлик тажрибаларини ўрганиш учун бевосита ушбу давлатларда машғулот олиб боришмоқда.

300 га яқин ёш қиличбозни ўзида жаъмлаган Ўзбекистон чемпионати 7 феврал кунига қадар давом этади. Мусобақа ғолиб совриндорлари миллий терма жамоага жалб қилинади. Бу каби турнирлар 2018 йил Аргентинада ўтадиган, ёшлар ўртасидаги Олимпияда ўйинлари учун тайёргарлик-саралаш бўлиб хизмат қилади.