ЖЧ–2018 саралаш босқичида 9 очко билан учинчи ўринда бораётган Ўзбекистон миллий терма жамоаси Жаҳон чемпионати саралаш босқичи иккинчи даврасига тайёргарлик кўриш мақсадида Туркиянинг Анталия шаҳрида навбатдаги ўқув-машғулотлар йиғинини бошлади.
Машғулотлар тўрт кун давом этиши белгиланган.
Мазкур йиғин доирасида Ўзбекистон терма жамоаси иккита ўртоқлик учрашуви ўтказади. 10 февраль куни Самвел Бабаян шогирдлари Россия Премьер-лигаси вакили “Амкар” клуби, 11 февраль куни эса Арманистоннинг “Алашкерт” жамоаси билан куч синашади. Мазкур йиғин ФИФА кунларига тўғри келмаганлиги учун легионер футболчилар терма жамоанинг Туркиядаги ўқув-машғулотларига таклиф этилмади.
Маълумот учун, бундан аввал Арманистон футбол федерацияси икки терма жамоалар ўртасида ўтказилиши белгиланган учрашувни Туркиядаги нотинчликлар туфайли бекор қилишини маълум қилганди.
