Ўтган йили олий лигадаги ўрнини сақлаб қолган Тошкентнинг «Обод» клуби янги мавсумга тайёргарликни давом эттирмоқда. Аниқроғи, Рауф Инилеев шогирдлари машғулотларни ўз базаларида олиб боришмоқда. Таъкидлаш лозим, таркибда жиддий ўзгаришлар йўқ. Жамоа йиғин доирасида «Махтаарал» (Қозоғистон, 3:2), «Пахтакор» (0:2), «Бухоро» (0:2), «Сўғдиёна» (4:2) клубларига қарши назорат ўйинлари ўтказди. Клубга боғлиқ энг муҳим янгиликлардан бири шуки, ўтган йили «Обод»нинг олий лигада қолишига катта ҳисса қўшган жамоанинг собиқ бош мураббийи Жаъфар Ирисметов бундан буён селекционер-мураббий сифатида фаолият юритади. «Сўғдиёна»га қарши ўртоқлик учрашуви якунлангач, биз Ирисметовдан интервью олдик.
- Жаъфар ака, ўтган йили бош мураббий сифатида ҳаракат қилиб, жамоанинг олий лигада қолишига ҳисса қўшгандингиз. Бу йил эса вазият ўзгарди. Буни қандай қабул қилдингиз?
- Футболда янгиланишлар, кутилмаган ҳолатлар учраб туради. Шу боис, клубда рўй берган ўзгаришларни одатий ҳол сифатида қабул қилдим. Бу - футбол, унда доим ҳам сиз ўйлаган нарсалар амалга ошавермас экан. Қисқаси, вазиятга жиддий эътибор қаратмадим.
- Сир бўлмаса, ҳозир «Обод»да қайси лавозимда ишлаяпсиз?
- Маслаҳатчи-мураббий ва селекция жараёнига масъул мутахассис сифатида фаолият юритяпман ва жамоамизга мос келадиган футболчиларни кузатяпман.
- Тажрибали мутахасис Рауф Инилеевнинг «Обод» жамоасига бош мураббий этиб тайинланишига муносабатингиз қандай?
- Рауф Талгатовичга ортиқча таъриф бериш шарт бўлмаса керак. Чунки, бу мутахассисни юртимиздаги ҳар бир футбол мухлиси яхши танийди.
- Муаммонинг сабабига кенгроқ изоҳ бера оласизми?
- Гап шундаки, биз ҳозирги шароитда юлдуз футболчиларни сафимизга қўшиб ололмаймиз. Юқори савияли ўйинчилар эса маълумки, хизматлари эвазига йирик маош талаб қилишади. Муаммо мана шунга боғлиқ.
- Жамоа ёш, истеъдодли футболчиларга таяниш мумкин-ку! Дейлик, ўтган мавсумда Шоҳруз Норхонов ўзини кўрсатиб, жамоанинг лигада қолишига муносиб улуш қўшганди...
- Албатта, юртимизда келажаги порлоқ ёшлар етарлича топилади. Бироқ бундай футболчиларнинг деярли барчаси мамлакатимизнинг етакчи клубларида жам бўлишган. Ўртамиёна жамоалар сафидан эса етакчиликни қўлга ола биладиганларни топиш амри маҳол.
- Келинг, масалага аниқлик киритиб олайлик: сизга қайси чизиқлар учун футболчилар топиш вазифаси юклатилган?
- Умуман олганда, жамоамиздаги деярли барча чизиқларни кучайтиришимиз лозим. Селекция жараёнининг бош мақсади ҳам шу, аслида. Лекин юқорида айтганимдек, натижалар ҳозирча мақтовга лойиқ эмас.
- Ўтган йили 14та гол билан олий лига тўпурарлари орасида учинчи ўринни эгаллаган Шоҳруз Норхонов борасида турли миш-мишлар юрибди. Айтишларича, у «Обод»ни тарк этганмиш...
- Йўқ, бу ҳали аниқ факт эмас. Ҳа, чиндан ҳам футболчимизни ўз сафида кўришни истаётган клублар кўп. Аммо клуб раҳбарияти ҳозирча бу масалада якуний қарор қабул қилмаган. Қолаверса, Норхоновнинг «Обод» билан тузган шартномаси ҳали охирига етмади. Шунингдек, у айни пайтда миллий терма жамоа йиғинида бўлиб турибди. Ўз ўрнида таъкидлаб ўтишим лозим, Шоҳрузнинг иккинчи бор терма жамоа йиғинига чақирилиши биз - клуб мутасаддиларини хурсанд қилди. Норхонов астойдил ҳаракат қилса, ҳали кўп ютуқларга эришади.
- Агар у жамоадан кетгудек бўлса, бу «Обод» учун катта йўқотишга айланади...
- Ушбу фикрга тўла-тўкис қўшиламан. Чиндан ҳам жамоамизнинг ўтган йилги муваффақиятларида бу футболчининг ҳиссаси ғоят катта бўлди. Шоҳруз тўпурарлик маҳоратини намо-йиш этиб, барчамизни бирдек қувонтирди. Ўзим ҳужумчи бўлганим учун, у билан алоҳида шуғулланишни ёқтирардим. Энг муҳими, Норхонов ўз устида ишлашдан тўхтаб қолмаслиги керак. Чунки ҳозир унинг айни ўсадиган пайти.
- Янги мавсумдаги режалар қандай? «Обод» раҳбарияти жамоа олдига аниқ вазифа қўйдими?
- Ҳали вазифа қўйилмади. Сабаби, айни пайтда жамоанинг шаклланиш жараёни давом этяпти ва клубда амалга оширилиши лозим бўлган ишлар ҳали жуда кўп. Таркибда ўзгаришлар рўй бериши аниқ. Лекин айтишим мумкинки, энг биринчи навбатда, олий лигадаги ўрнимизни сақлаб қолишга эътибор қаратамиз. Агар имкони бўлса, юқорироқ ўринлар учун курашамиз. Хабарингиз бор, ўтган йили футболчиларимизга озгина тажриба етишмаган эди. Умид қиламанки, бу йил жамоамиз аъзоларида ўзларига бўлган ишонч анча ортади ва натижаларимиз янги мавсумда ижобий кўриниш олади. Хуллас, жамоамиз мухлисларини чиройли ўйинларимиз билан хушнуд этишга ҳаракат қиламиз.
- «Обод»даги шарт-шароитлар ҳақида нима дея оласиз?
- Шароитлар ўртача, нолийдиган даражада эмас, ҳарқалай.
- Селекционер сифатида айтингчи, бошқа клублардаги қайси футболчиларнинг ҳаракати сизга маъқул тушяпти?
- Шу пайтгача бир нечта ўртоқлик учрашувлари ўтказдик ва уларда рақиб жамоа таркибида ҳаракат қилган айрим истеъдодли ёшларни кузатдим. Лекин селекция жараёни якунланмагани боис, кузатувларим хулосасини сир тутганим маъқул.
- Жаъфар ака, вақти келиб, ўз олдига жиддий мақсадларни қўйган жамоада ишлаш истаги борми сизда?
- Албатта, бор. Фақат, бунинг учун биринчи навбатда Pro лицензиясига ўқишим керак. Зеро, янги мавсумдан бошлаб ушбу гувоҳномага эга бўлмаган мутахассисларга олий лига клубларида бош мураббий лавозимида ишлаш учун рухсат берилмайди. «Обод»га Рауф Инилеевнинг бош мураббий этиб тайинланишида ҳам асосий омил шу эди, аслида.
Биз ҳозирги шароитда юлдуз футболчиларни сафимизга қўшиб ололмаймиз. Юқори савияли ўйинчилар эса маълумки, хизматлари эвазига йирик маош талаб қилишади. Муаммо мана шунга боғлиқ...
Манба: www.interfutbol.uz
