Испаниянинг Marca нашри «Реал» ҳужумчиси Криштиану Роналдунинг ўйин услуби ўзгарганини сезди.

Журналистларнинг ҳисоб-китобига кўра, Роналду «Наполи» ва «Эспаньол»га қарши ўйинларда рақибни кўпроқ алдаб ўтгани, жамоадошлари билан яхшироқ ўйнагани, тўпни кўп ушлаб турмасдан жамоавий ўйинга эътибор қаратгани ва дарвоза томон камроқ зарба йўллагани маълум бўлди.

Статистикага кўра, Криштиану рақибни алдаб ўтишга уринишлар сонини 2,3 дан 6тага, муваффақиятли алдаб ўтишлар сонини 0,7дан 3тага оширган. Футболчининг тўп билан муомаласи миқдори 48дан 53,5га кўпайган. Бу эса уни кўпроқ жамоавий ўйинга эътибор қаратаётганидан далолат бермоқда.

Қизиғи шундаки, Роналду дарвоза томон зарба йўллашнинг миқдорини камайтирган. Хусусан, сўнгги икки ўйинда бирорта аниқ зарба йўлламаган.

Эслатиб ўтамиз, "Реал" бу ўйинларда "Наполи"ни 3:1, "Эспаньол"ни 2:0 ҳисобида мағлуб этди.