"Шўртан"нинг собиқ бош мураббийи, ҳозирда "Торпедо-БелАЗ" устози Игорь Криушенко Беларус терма жамоасининг бош мураббийи вазифасини бажарувчи этиб тайинланди.

Бу ҳақида Беларус футбол федерациясининг расмий сайти хабар бермоқда.

"Бугун АБФФ раиси Сергей Румас ва беларус мураббийи Игорь Криушенко ўртасида учрашув бўлиб ўтди. Суҳбат натижасида мутахассис мамлакат миллий терма жамоасининг бош мураббий вазифасини бажарувчи этиб тайинланиши билан тугади. Ҳужжатлар яқин вақтлар ичида расмийлаштирилади", - дея хабар беради федерация матбуот хизмати.

Январ ойида Беларусь терма жамоасини бошқариш учун россиялик мутахассислар Николай Писарев, Александр Бородюк ва Валерий Карпин номзоди кўрсатилган эди.

Криушенко БАТЭ клуби билан икки марта Беларус чемпионлигига эришган (2006, 2007), икки марта Беларус кубогини қўлга киритган (2006 - БАТЕ, 2016 - Торпедо-БелАЗ). 2011-2012 йилларда "Шўртан"ни бошқарган.