Олий лига 2-туридан ўрин олган "Нефтчи" - "Пахтакор" (0:0) баҳсидан сўнг тошкентликлар устози Григорий Колосовский журналистлар саволларига жавоб қайтарди.

«Қизиқарли ва кескин курашларга бой ўйин бўлди. Бугунги беллашувда "Пахтакор" ўйинни назорат қилиб борди. Бироқ бизда яққол хавфли вазиятлар жуда кам бўлди. Фақат Сергеевнинг дарвозага боши билан йўллаган зарбасини ҳисобга олмасак бизда айтарлик вазиятлар бўлмади.

Жамоадан янада кучли ўйин кутгандим. Ҳакамлар очиқ футбол ўйнашга йўл беришди. Жамоалар охиргача курашишди. Яккакурашлар ҳам қизғин кечди. Хорижий йиғинлар чоғида бир қатор чет эл клублари билан ўртоқлик баҳслари ўтказдик. Лекин барибир у жамоалар билан Олий лига клублари ўртасида катта фарқ бўлади» - деди Колосовский.