Сиз "Барселона"ни ёқтирасизми, ёқтирмайсизми, унга мухлисмисиз, йўқми - кечаги ғалабани эътироф этиш ва бу жамоага тан бериш лозим ва лобуд. Ҳакамнинг йўқ пенальтини ўйлаб топгани-ю, кўп вақт қўшиб бергани ҳақидаги гаплар ҳеч нарсани ўзгартирмайди. "Барса" мана шу ғалабага лойиқ эди - ўйини билан, иштиёқи билан ва энг асосийси, ғурури билан.
Яна бир жиҳат: менимча, ҳисоб 4:0 бўлганида ва қўшимча таймда "Барса" ютганида ёки асосий вақтнинг ўзида 5:0 бўлганида кечаги ғалабанинг, камбэкнинг тафти, эйфорияси бунчалик бўлмасди. Барса кеча "2 in 1" - иккита камбэк қилди. Каванининг голидан кейин исталган жамоа синган бўларди, тахминимча. Ҳатто бошқа пайтдаги "Барса" ҳам синарди. Аммо кечаги "Барса" эмас! "Барселона" футболчилари ўзларидан нимаики лозим бўлса қилишди ва тақдирланишди. ПСЖ мағлуб бўлиш учун нимаики лозим бўлса қилди ва "тақдирланди".
ЕЧЛ тарихидаги уч буюк камбэкдан бири муаллифлари ва уларнинг мухлислари - сизни табриклайман! Буюк жамоанинг буюк давридаги буюк ғалабаларига гувоҳ бўлиб яшаётганингиз - бу зўр!
Бобур АКМАЛОВ
"Ориат Доно" (FM 106.5) радиоканали журналисти
