"Қизилқум" - "Навбаҳор" (2:1) учрашувидан сўнг ташкил этилган матбуот анжуманида меҳмонлар устози Илҳом Мўминжонов ўз фикрини айтди.

"Бугунги ўйинда мағлубиятга лойиқ эмасдик. "Қизилқум" жамоасида иккита вазият бўлди ва бундан навоийликлар фойдаланиб, бизга гол уришди. Иккинчи бўлимда ўтказиб юборган голимиз бизга оғир ботди. Йигитлар яхши ўйин намойиш қилишди, берилган кўрсатмаларимни тўғри бажаришди, аммо омад бизга кулиб боқмади. Биринчи бўлимда ҳисоб тенглигида бизда голга тортадиган хавфли вазият бўлганди. Мансур Саидов бу холатда тўпни Неманья Йовановичга беришни афзал билди. Шуни биз голга айлантиришимиз керак эди. Бу футбол... Майдон текис, тўп юмалоқ. Аввал ҳам таъкидлаганимдек жамоага таклиф этилган футболчилардан фахрланаман. Мен чақирган ўйинчилар ўйиндан-ўйинга чиройли футбол намойиш этиб, мухлисларимизга ғалабаларни тортиқ этишади. Клубга жалб этилганлар билан ҳали кўп ютуқларга эришамиз. Бугун бизга омад етишмади. Ўйин тугашига 15 дақиқа қолганида тўпни назорат қилиш бизда бўлгани ва рақибга босим ўтказиш кераклиги сабабли Мансур Саидовнинг ўрнига Рўзимбой Аҳмедовни майдонга туширдим. Икки ҳужумчи билан ўйин услубига ўтдик. Камчиликларимиздан тўғри хулоса чиқарган холда кейинги беллашувга тайёргарлик кўрамиз. "Қизилқум" майдони бугун идеал холатда эканини айтишим лозим. Ҳар бир ўйингоҳдаги майдон шунақанги бўлишини истардим" - деди Мўминжонов.