Ўзбекистон Олий лигасининг 3-туридан жой олган 6 та учрашув якунига кўра мухлислар ташрифи миқдори маълум бўлди.
Унга кўра, Наманганнинг «Навбаҳор» клуби нафақат 3-турдаги, балки мавсумдаги энг юқори кўрсаткични қайд этган. «Нефтчи»га қарши водий дербисини томоша қилиш учун стадионга 18 992 томошабин ташриф буюрган.
1-турда «Навбаҳор» энг яхши кўрсаткични қайд этганди. 2-турда эса мавсум рекордини ўзи янгилади.
Тошкентнинг «Пахтакор» клуби ўтказилган олти учрашувда энг кам томошабин тўплагани билан ажралиб турди — 2 117. Клуб раҳбарияти мухлисларни стадионга жалб қилиш учун Damas автомобилини ютуқ сифатида ўйнаганига қарамай, бу нарса ишқибозларга таъсир кўрсатмади.
«Пахтакор» стадионига кириш чипталари 10 ва 20 минг сўмдан сотилганди. Буни ўртача 15 минг деб олинса, чиптадан тушган пул тахминан 32 миллион сўмни ташкил қилади. Damas’нинг энг арзони эса GM сайтида 34 миллион деб кўрсатилган бўлиб, уни ҳам хорижий валютага сотиб олиш керак.
«Пахтакор»нинг 1-турдан ўрин олган «Қизилқум»га қарши ўйинида Damas ўйналиши ваъда қилинган бўлиб, бу ваъда учрашув куни ўз кучини йўқотган ва стадионга кириш бепул қилинганди. Ўша куни «Пахтакор»га 4 мингдан зиёд ишқибоз келди. Кейинроқ эса унга олий ўқув юрти талабалари мажбуран олиб борилгани ҳақида хабарлар пайдо бўлди.
Ўзбекистон Олий лигаси
3-тур
Мухлислар ташрифи
«Навбаҳор» — «Нефтчи» 1:1 (18.992)
«Бухоро» — «Обод» 0:1 (7.631)
«Қўқон—1912» — «Қизилқум» 1:0 (7.621)
«Шўртан» — «Машъал» 0:2 (4.751)
«Сўғдиёна» — «Олмалиқ» 3:2 (3.712)
«Пахтакор» — «Динамо» 0:1 (2.117).
