Испаниянинг «Реал» ва Англиянинг «Тоттенхэм» клублари ёзги трансфер пайтида ўзаро футболчи алмашиши мумкин.
AS нашри тарқатган хабарга кўра, Матео Ковачич "Қироллик клуби"да етарли ўйин амалиётига эга бўлмаётганидан норози ва шу боис, у ёзда "Реал"ни тарк этишни режалаштирмоқда. "Тоттенхэм" бош мураббийи Маурисио Почеттино ёзда 22 ёшли хорватиялик футболчини жамоага таклиф қилмоқчи. "Шпорлар" ярим ҳимоячи учун 20 миллион евро тўлашга тайёр, аммо "қаймоқранглилар" 25 миллион евро талаб қилмоқда.
Шунингдек, "Реал" раҳбарияти "Тоттенхэм"га ўзаро футболчи алмашишни таклиф қилмоқда. Мадридликларнинг таклифига кўра, Ковачич Лондонга, лондонликлар ярим ҳимоячиси Деле Алли эса Мадридга йўл олиши керак. Бундай ҳолатда "Реал" англиялик футболчи учун "шпорлар"га яна қўшимча пул тўлашга рози.