Ўзбекистон Кубоги 1/16 финал босқичи доирасида Зоминда маҳаллий «Зомин» клуби меҳмони бўлган «Динамо» жамоаси сафардан иродали ғалаба билан қайтди.

Жорий мавсумда Биринчи Лигада жиддий мақсадларни кўзлаётган Жиззах вилоятининг «Зомин» клуби футболчилари мавсумдаги дастлабки ўйиннинг илк дақиқаларидан ҳужумкорликни ошириб, 6-дақиқадаёқ ҳисобни очишди, 1:0.

Ушбу тезкор гол маҳаллий мухлислари қаршисида тўп сураётган зоминлик футболчиларни яна олдинга бошлаши кутилганди, аммо аксинча бўлиб чиқди.

Ҳужумкорликни оширган «Динамо» футболчилари орадан 10 дақиқа ўтиб, 16-дақиқада Сардор Сулаймоновнинг голи эвазига мувозанатни тиклашди, 1:1.

Ҳисоб тенглашгач, вакилларимиз яна ҳужумга ўтишди. 22-дақиқада бурчакдан ошириб берилган тўпни ҳужумга етиб келган марказий ҳимоячи Бунёд Исроилов бош билан рақиб дарвозасига жойлаб, Самарқанддан ташриф буюрган мухлисларнинг олқишига сазовор бўлди, 1:2.

Ўйиннинг қолган қисмида ҳам ҳар икки томон ҳам мухлисларга шиддатли ўйин тақдим этишган бўлишсада, кичик ҳисобдаги устунлик сақланиб қолинди ва бу натижа «Динамо»га нимчорак финал йўлланмасини тақдим этди.

Ўзбекистон Кубоги. 1/16 финал.

«ЗОМИН» - «ДИНАМО» - 1:2

Ҳакамлар: А. Асимов (Тошкент), Р. Серазетдинов (Тошкент), А. Цапенко (Тошкент вил.), М. Турдиев (Жиззах)

Голлар: ? 6 – Сардор Сулаймонов 16, Бунёд Исроилов, 22.

«Динамо»: Михаил Наумов, Миркомил Локаев, Бунёд Исроилов, Шохруҳ Холматов, Жасур Азимов, Акмал Бозоров, Раду Рогак, Ориф Мамажонов (Амиржон Сафаров, 66), Искандар Холмирзаев (Омаджон Тайлоқов, 80), Комил Шарофутдинов, Сардор Сулаймонов (Абдумалик Абдуллаев, 55).

Назоратчи: Б. Тоғаев (Тошкент).

Эслатиб ўтамиз, «Динамо» жамоаси навбатдаги учрашувни 31 март куни 4-тур доирасида Самарқандда Наманганнинг «Навбаҳор» жамоасига қарши ўтказади.