2009 йилда “Қироллик клуби”га кўчиб ўтган франциялик ҳужумчининг жамоадаги ўрни кўп вақт сўроқ остида қолди. Ҳужум чизиғидаги кучли рақобатга қарамай 29 ёшли ҳужумчи ҳозирга қадар “Реал”нинг асосий таркибида ва жамоа билан барча совринларни ютиб олишга ҳам эришди.
Карим Бензема “Реал”га кўчиб ўтиш арафасида 21 яшарли “Лион”нинг юлдузи мақомида эди. Унинг мадридликлар сафига ўтишини навбатдаги “Галактика”ни қураётган Флорентино Переснинг ўзи истади. У клубга эндигина келган чоғида эса “Реал”да Роналду, Кака, Раул, Хаби Алонсо каби жаҳон даражасидаги юлдузлар бор эди. Жамоада етарлича юлдуз ўйинчилар борлигига қарамасдан Бензема ҳозиргача асосий таркибдан жой олиб келмоқда.
Унинг Криштиану Роналду билан яратган тандеми эса мадридликларга кўплаб ғалабалар келтирди. Ўзининг шахсий мақсадларидан кўра жамоа манфаатларини устун кўрадиган ҳужумчи португалиялик шериги учун голли вазият яратиб беришда ҳам жонбозлик кўрсатди. Айниқса бу ҳолат Моуринё қўл остидаги “Реал”да юқори савияда эди. Моуринё билан узоқ кутилган Ла Лига чемпионлигига эришган Бензема мавсум давомида 21 гол уриб ўзининг энг яхши тўпурарлик салоҳиятини ҳам намойиш эта олди. Кейинчалик Игуаин билан рақобатдан халос бўлган франциялик ҳужумчи асосий таркибдан муқим жой эгаллади.
Карло Анчелотти қўл остида ўйнаган Бензема собиқ устози томонидан ҳам юқори баҳоланди. Ўз интервюларидан бирида италиялик мураббий қуйидаги фикрларни билдириб ўтган эди: “Бенземани фантастик ҳужумчи демайман балки фантастик ўйинчидир. Бу энг тўлиқ ифода. У бошқа ҳужумчилардан камроқ гол урар, лекин у ажойиб ўйинчи. Роналду ва Бейл учун идеал шерик. У бажараётган ишидан мамнун. У камтар, супер юлдуз эмас. Мен уни жуда яхши биламан, “Реал” учун ажойиб ишларни бажармоқда.”
Сўнгги пайтда эса Бензема жамоа билан янги шахсий рекордларни ўрнатишни ҳам бошлаб юборди. Апрел ойи бошида “Реал” сафида Испания чемпионатидаги 120-голини нишонлади. “Реал” тўпурарлари сафида эса Бензема 179 гол уриб 9-ўринда бормоқда. 8-ўриндаги Пако Хентодан 2 гол ажратиб турибди.
Бу оқшом, «Бавария»га қарши баҳсда гол урадиган бўлса, яна бир тарихий рекорд қайд этади. Чемпионлар Лигаси мусобақасида Бензема франциялик энг яхши тўпурарга айланиб олиши мумкин.
