Олий лиганинг 7-тури доирасида "Пахтакор" ва "Локомотив" ўртасидаги марказий ўйин бўлиб ўтди.

Ўйин юқори савияда ўтди деб айтиш қийин. Баҳс сўнгига келиб "ҳарорат" ошганини таъкидлаш лозим.

Ўйиннинг 9-дақиқасида мезбонлар пенальти тепиш ҳуқуқига эга бўлишди. Станислав Андреев 11 метрли жаримадан зарба бериб, тўпни юқорига тепиб юборди. Биринчи бўлим ўрталарида "Пахтакор" дарвозаси томон пенальти белгиланди ва Марат Бикмаев ундан самарали фойдаланди.

Орадан кўп ўтмасдан пахтакорчилар ҳисобни тенглаштиришди. Жаримадан етказилган узатмани Аднан Ораховац рақиб дарвозасига жойлаб қўйди.

Юқорида айтганимиздек, ўйин сўнгига келиб, темп бироз ошди. Дастлаб Жасур Ҳакимов ўта қулай имкониятдан фойдалана олмади. Темирйўлчилар эса ўз имкониятларини голга айлантиришди. Алибоев ўнг қанотдан етказган узатмани Махарадзе бош билан дарвозага жойлади. Лобанов тўпни қайтарди, аммо Бикмаев дарвозани ишғол қилди.

Ўйиннинг сўнгги дақиқаларида "Пахтакор"нинг бир эмас, икки футболчиси майдондан четлатилди. Дастлаб Камолиддин Тожиев Алибоевга нисбатан қўпол ўйнади ва иккинчи сариқ карточка туфайли майдонни тарк этди.

Қўшиб берилган дақиқаларда эса мезбонлар бурчак тўпини ўйинга киритиш ҳуқуқини қўлга киритишди ва. Лобанов "Локо" жарима майдончасига етиб келди. Саша дастлаб темирйўлчилар ҳимоячиси Муҳаммад Коне билан "сан-ман"га боргани учун сариқ карточка олди. Бурчакдан етказилган узатмага Лобанов бош билан зарба бериб, ҳисобни тенглаштиришига бир бахя қолди. Нестеров майдонни тарк этган тўпни олиб, ўз дарвозаси олдига ўрнатаётганида, Лобанов тўпни ён томонга тепиб юборди. Натижада ҳакам "Пахтакор" дарвозабонига 1 дақиқа ичида иккинчи "сариқ"ни, кетидан қизил карточкани кўрсатишга мажбур бўлди.

Равшан Ҳайдаров бу пайтда яна бир ўзгартиришни сақлаб қолган экан, захира посбони Шерзод Каримовнинг ўрнига туширилди.

"Локомотив" муҳим ғалабани қўлга киритди ва ўз очколарини 15тага етказиб, пешқадам бўлиб олди.

Олий лига. 7-тур, 18:00
«ПАХТАКОР» – «ЛОКОМОТИВ» 1:2
Голлар: Аднан Ораховац (33) — Марат Бикмаев (26-пенальти, 81)
Четлатишлар: Камолиддин Тожиев (86, иккинчи огоҳлантириш), Александр Лобанов (90+2, иккинчи огоҳлантириш)
"Пахтакор": Александр Лобанов (с), Владимир Козак, Аднан Ораховац, Юрица Булят, Даврон Ҳошимов, Азим Аҳмедов, Акбар Исматуллаев, Камолиддин Тожиев, Станислав Андреев, Шерзод Каримов, Жасур Ҳакимов
Захира: Ҳожиакбар Жўраев, Жамшид Искандеров, Суҳроб Нуруллаев, Иброҳим Ғанихонов, Шоҳрух Маҳмудҳожиев, Жамшид Юсупов, Хушнуд Авилов
"Локомотив": Игнатий Нестеров, Олег Зотеев, Ислом Тўхтахўжаев, Муҳаммад Коне, Салим Мустафоев, Кахи Махарадзе, Темур Кападзе (с), Икром Алибоев, Сардор Мирзаев, Марат Бикмаев, Мурод Бобожонов
Захира: Маъмур Икромов, Бобур Йўлдошев, Садриддин Абдуллаев, Шуҳрат Муҳаммадиев, Қувондиқ Рўзиев, Шерзод Файзиев, Диёржон Туропов
Ҳакамлар: Б. Намозов (Тошкент), М. Саидқосимов (Тошкент), Р. Шояхметов (Тошкент), Д. Мухторов (Тошкент)
Назоратчи: Р. Серазетдинов (Тошкент)