«Навбаҳор»нинг мухлислар орасида ўтказилган сўровнома якунларига кўра, апрель ойидаги энг яхши футболчи аниқланди.
133 мухлис иштирок этган сўровномада марказий ҳимоячи Ғиёсжон Комилов 40 фоиз (53 та) овоз тўплаб, биринчи ўринни қўлга киритди. Ярим ҳимоячи Ойбек Қиличев эса 24 фоиз (32) овоз билан иккинчи бўлди. Кучли учликни дарвозабон Асилбек Аманов 14 фоиз (18) овоз билан якунлади. 23 ёшли дарвозабон кетма-кет тўртта "қуруқ ўйин" ўтказган чемпионатдаги ягона футболчи бўлиб турганини қўшимча қилиш лозим.
Эслатиб ўтамиз, апрель ойида "лочинлар" "Машъал" ва "Шўртан" устидан 1:0 ҳисобида ғалаба қозониб, "Металлург" билан дуранг (0:0) қайд этишди ва "Пахтакор" майдонида имкониятни бой беришди.
