“Челси”нинг франциялик яримҳимоячиси Англия матбуоти томонидан Премьер-Лиганинг энг яхши ўйинчиси деб топилди.

Бир неча кун аввал футболчилар томонидан энг яхши деб топилган Кантени бу сафар Британия матбуоти томонидан 2016/2017 йилги мавсумнинг энг яхши ўйинчиси дея эътироф этилди. “Кан” ва “Лестер”нинг собиқ аъзоси бу соврин учун курашда жамоадоши Эден Азар ва “Тоттенҳэм” вакили Деле Аллини ортда қолдириб кетди.

Британия Журналистлар уюшмаси (FWA) аъзолари Кантени Азар, Диего Коста ёки Давид Луиздан ҳам юқори баҳолади.

Азар ва Канте 17 футболчи жой олган рўйхатда 65%дан ортиқ овоз олишди. Нголо Канте дарҳақиқат ушбу мавсумда Антонио Конте бошчилигидаги жамоанинг муҳим бўлагига айланди. Франциялик футболчи Гарет Бэйл (2013), Луис Суарес (2014), Эден Азар (2015) ва Жейми Вардидан (2016) кейин ушбу совринга лойиқ кўрилган футболчи бўлди.

“Челси” билан Премьер-Лигада пешқадамлик қилаётган Кантенинг якунига етаётган мавсумдаги кўрсаткичлари ҳайратланарлидир. Канте ҳозирча 33 учрашув ўтказиб, 1773 аниқ пас узатган. Бундан ташқари, 74 марта рақиб ҳужумини тўсган ва 79 марта тўпни рақибдан олиб қўйган.