"Реал" ҳужумчиси Криштиану Роналду Испания чемпионатининг 37-тури доирасида "Севилья"га қарши ўйинда қўпол хатти-ҳаракатни амалга оширди.

Баҳснинг 32-дақиқасида, "Реал" 2:0 ҳисобида олдинда бораётган пайтда португалиялик футболчи "Севилья" ҳимоячиси Клеман Лангленинг юзига онгли равишда уриб кетди. Майдон марказига яқин жойда Криштиану рақибига тўпни олдириб қўйди ва шундан сўнг футболчининг ортидан етиб олиб, Лангленинг юзига уриб йиқитди. Учрашув ҳаками Ундиано Мальенко фол бўлганини кўрди, аммо тўп андалусияликларда қолгани боис, ўйинни тўхтатмади. Кейинчалик эса рефери Роналдуга ҳеч қандай огоҳлантириш бермади. Бу қўполлик қизил карточка тортар эди.

Mundo Deportivo тарқатган хабарга кўра, бу ҳолат Роналду иштирокида Ла лига баҳсларида юз берган ўнинчи тажовузкор ҳаракат бўлди. Португалиялик футболчи ҳар сафар дисквалификациядан қутулиб қолган.