Бугун Европада мавсумни якунлаб берувчи энг сўнгги ўйин бўлиб ўтади. Лекин қандай ўйин бу?! Кўҳна қитъанинг энг нуфузли мусобақаси ғолибини аниқлаб берадиган ўйинга баҳсин қандай жамоалар етиб келишди?!

"Реал" Европа чемпионлар лигасини анчайин "ўзиники" қилиб олди. Мадридликлар, ниҳоят, ЕЧЛни кетма-кет 2 марта ютиб чиққан дастлабки клубга айланиши мумкин. Бунинг учун Зидан шогирдларида барча имконият бор. Мавсум сўнггига келиб "Қироллик клуби" яхши формага кирди, футболчиларнинг барчаси ажойиб формада. Фақат ЕЧЛ финали олдидан юзага келган 2 ҳафталик оралиқ жамоани ўйин ритмидан бироз узоқлаштириб қўймаган бўлса бўлган. Назаримизда, ундай эмас, аксинча, Зидан жамоани ўта муҳим учрашувга мақсадли тайёрлай олган.

"Ювентус" ҳам ушбу мавсумда йўлида учраган рақибларни аяб ўтирмади. Туринликларда Европанинг камдан-кам жамоаларига насиб этган "требл" қилиш имконияти бор. "Какса синьора" Италия томонларда ҳам чемпионлик, ҳам кубокни қўлга киритиб бўлди. Энди навбат — Европа чемпионлар лигасига. Метин ҳимоя ва ишончли дарвозабон ҳар қандай жамоанинг асабини эговлаши аниқ. "Ювентус"да жамоавий ўйин яхши шаклланган, клуб ҳам яхши ўйин тонусида. Яна бир марта ҳаракат қилинса, ниҳоят, Буффон бошчилигидаги йигитлар қитьанинг бош совринига эга чиқишади.

Хуллас, бизни жуда қизиқарли ўйин кутиб турибди. Ким ғолиб чиқса, бунга ҳақли равишда эришади. Бир-бирига мос жамоалар.

Демак, бугун Уэльс пойтахти — Кардифф шаҳри. "Миллениум" стадиони. Тошкент вақти билан 23:45. Учрашувни биргаликда томоша қиламиз. Сайтдан узоқлашманг, матнли онлайн трансляцияни бизда кузатиб боринг. Ҳаммаси ажойиб бўлади.