Қозоннинг "Рубин" клуби Қурбон Бердиевни янги бош мураббий этиб тайинланганини эълон қилди.
Жамоанинг собиқ бош мураббийи испаниялик мутахассис Хавер Гарсия ўтган мавсумдаги омадсиз иштирок сабаб ўз вазифасидан озод этилган эди. "Рубин" испаниялик мураббий бошчилигида Россия чемпионатида 9-ўрин билан кифояланди.
«Биз ўз штабимиз билан бирга қайтганимиздан жуда хурсандмиз. "Рубин" ва Қозон — бу бизнинг уйимиз, яна бирга ишлашдан мамнунмиз», — дейилган Бердиевнинг баёнотида.
Қозон клуби бош директори Рустам Саяхов Бердиев билан узоқ муддатли шартнома тузилиши ҳақида маълум қилган.
Ҳозирда шартнома имзоланмаган бўлсада Бердиев клубда иш бошлаган ва 10 июн куни "Рубин" билан илк йиғинга жўнаб кетади.
Бердиев қозонликлар клубида 12 йил давомида (2001 йилдан 2013 йилгача) ишлаган ва икки марта Россия чемпиони бўлган, шунингдек Россия Кубоги ва Суперкубогида ғолиб бўлган. Кейинги йилларда у "Ростов"да фаолият кўрсатаётганди.
