"Нефтчи" клубининг собиқ дарвозабони Ғайратжон Ҳасановга Яйпанда ўз маблағлари ҳисобига янги стадион қуришга маҳаллий ҳокимият вакиллари тўсқинлик қилишмоқда.
Бу ҳақда 34 яшар Ҳасанов "Ўзбекистон" телеканали "Муносабат" кўрсатувида маълум қилди.
"2 млрд сўмлик ўз маблағларим ҳисобига Яйпандаги 1970 йилда қурилган эски, нураб тушаётган стадион ўрнида янги стадион ва болалар шуғулланадиган футбол мактабини қуриш лойиҳаси билан маҳаллий ҳокимият вакилларига чиқдим. Вилоят ҳокими билан ҳам учрашдим. Аммо бу масала ҳалигача ҳал бўлмай келмоқда.
Ахир жаҳон ва Осиё даражасидаги иқтидорли ёш футболчиларни етиштириб, 3 млн доллар эвазига хорижий клубларга жўнатсак, ахир бу ҳам туман иқтисодиётига ёрдам бўлмайдими.
Бундан ташқари стадион ва футбол мактаби очиладиган бўлса, бу ерда 30 нафар одам иш билан таъминланади. Менинг Фарғонада уйларим бор, Тошкентда ёки Қаршида ўз ишимни топиб олишим ҳам мумкин. Аммо стадионни айнан ўзим туғилган жойда қуришга ният қилганман", - деди Ҳасанов.
