"Neftchi" klubining sobiq darvozaboni G‘ayratjon Hasanovga Yaypanda o‘z mablag‘lari hisobiga yangi stadion qurishga mahalliy hokimiyat vakillari to‘sqinlik qilishmoqda.
Bu haqda 34 yashar Hasanov "O‘zbekiston" telekanali "Munosabat" ko‘rsatuvida ma’lum qildi.
"2 mlrd so‘mlik o‘z mablag‘larim hisobiga Yaypandagi 1970 yilda qurilgan eski, nurab tushayotgan stadion o‘rnida yangi stadion va bolalar shug‘ullanadigan futbol maktabini qurish loyihasi bilan mahalliy hokimiyat vakillariga chiqdim. Viloyat hokimi bilan ham uchrashdim. Ammo bu masala haligacha hal bo‘lmay kelmoqda.
Axir jahon va Osiyo darajasidagi iqtidorli yosh futbolchilarni yetishtirib, 3 mln dollar evaziga xorijiy klublarga jo‘natsak, axir bu ham tuman iqtisodiyotiga yordam bo‘lmaydimi.
Bundan tashqari stadion va futbol maktabi ochiladigan bo‘lsa, bu yerda 30 nafar odam ish bilan ta’minlanadi. Mening Farg‘onada uylarim bor, Toshkentda yoki Qarshida o‘z ishimni topib olishim ham mumkin. Ammo stadionni aynan o‘zim tug‘ilgan joyda qurishga niyat qilganman", - dedi Hasanov.
