«ПСЖ» яримҳимоячиси Анхел Ди Мария Испания суди томонидан солиқларни тўлашдан бўйин товлаганликда айбдор деб топилди.
Ди Мария 2012-2013 йилларда «Реал» таркибида ўйнаганида, имиж ҳуқуқларини сотишдан олган 1,3 млн евро миқдоридаги даромадни яшириш мақсадида оффшор компания хизматидан фойдаланган. 29 ёшли футболчининг айби судда тўлиқ исботланди.
Прокурор Ди Марияни иккита солиқ жиноятини амалга оширгани сабабли 1 йил қамоқ жазосига маҳкум қилинишини сўраган эди. Бироқ, футболчи тергов идоралари билан ҳамкорлик қилгани учун 2 млн евро миқдоридаги жарима билан қутулиб қолди.
