Футбол оламида солиқ билан боғлиқ можаролар анча пайтдан бери кузатилиб келинган. Айниқса, Испания чемпионатида. Гап шундаки, мазкур мамлакатда футболчилар тўлайдиган солиқ бошқа давлатларникидан каттароқ. Шунинг учун ҳам баъзида футболчилар мўмай пулдан айрилишни исташмайди ва қонунни айланиб ўтишга қарор қилишади. Оқибатда тергов ва суд жараёнлари бошланади.
Айни дамда “Реал” юлдузи Криштиану ана шундай можаролар гирдобига тушиб қолган. Одатда, бундай вазиятда футболчилар тинчгина жарима тўлаб қўя қолишади. Бироқ негадир Роналду ўзига нисбатан айбловларни тан олмаяпти, у бир тийин ҳам тўламоқчи эмас? Хўш, у нега бундай йўл тутмоқда?
Пул энг муҳими эмас
Бу ерда пул муҳим ўрин тутаётгани йўқ. Криштиану Испанияга кўчиб ўтганидан бери икки-уч марта солиқ билан боғлиқ можарога дуч келган ва ҳар доим талаб қилинган жаримани тўлаб, можародан халос бўлган. Хўш, унда нега ҳозир шу ишни қилмаяпти? Ваҳоланки, у тўлаши керак бўлган пул даромади олдида ҳеч нарса эмас. Гап шундаки, Криштиану айбловни тан олмаяпти, шу боисдан шунчаки пул тўламоқчи эмас, у ҳақини талаб қиляпти. Роналду кўрди — ҳар сафар жарима тўлаган, аммо яна уни айблашда давом этишяпти. Шу боис Роналду бўйсунишдан фойда йўқлигини билди ва қайсарлик қила бошлади.
“Реал”дан аламзадалик кайфияти
Гарчи бу можаролар бошланганига анча бўлган бўлса-да, “Реал” Роналдуни тўлиқ ҳимоя қилаётгани йўқ. Тўғри, жамоа Роналдуни расман ҳимоя қила олмайди, чунки Роналду жамоадан олган маошидан эмас, реклама ва бошқа футболдан ташқари даромадларидан солиқ тўламаганликда айбланяпти. Бироқ, шундай бўлса-да, Флорентино Переснинг икки оғиз гапини ҳисобга олмасак, клуб раҳбарлари Криштиануни тузук оқлашгани йўқ. Бу эса Роналдуга ёқмаяпти ва аламзада ҳолатига тушиб қолган. Шунинг учун ҳам курашишни тўхтатгиси йўқ, шунинг учун ҳам “ПСЖ”га ўтмоқчи эканлигини қайта-қайта таъкидлаяпти.
Ғишт қолипдан кўчди
