«Реал» дарвозабони Кейлор Навас ҳужумчи Криштиану Роналдунинг жамоани тарк этмаслигига умид билдирди.

Айни пайтда, солиқларни тўлашдан бўйин товлаганлик айблови туфайли, португалиялик футболчининг «Реал»даги келажаги сўроқ остида турибди.

«Мен Криштиануга қўнғироқ қилмадим. Бундай ишларга аралашмайман. Албатта уни жамоа таркибида қолишини истайман. Бундай маҳоратга эга футболчи клубни тарк этмаслиги лозим. Умид қиламанки, у «Реал»дан кетмайди ва кўп йиллар давомида жамоа таркибида тўп суради» - деди Навас Marca хабарида.

Эслатиб ўтамиз, Испания прокуратураси Роналдуни 14,7 млн евро солиқларни тўлашдан бўйин товлаганликда айбламоқда. Шу ҳафтада футболчи клуб президенти Флорентино Перес билан учрашиб, ўз келажагига ойдинлик киритмоқчи.